???? إيران دلوقتي بتضرب القوات البريطانية في قبرص والبحرين، وبتضرب شرق السعودية، وضربت مقر المخابرات الأمريكية في دبي... ومع كل ده سعر النفط والدهب والدولار بيزيدوا في وقت واحد!
المشاهد اللي طالعة من دول الخليج دلوقتي مخيفة، والتطورات اللي حصلت كتير والتصعيدات ما زالت مستمرة وبتزيد بشكل كبير...
خليني كده ألملك أهم الحاجات اللي حصلت خلال الكام ساعة اللي فاتوا، عشان ميفوتكش حاجة وتبقى فاهم لما نتكلم عن التفاصيل في بوستات جاية... وطول بالك معايا عشان هناخدها بالترتيب ????
أولًا كده، إيران زي ما حكيتلك في آخر بوست فات تلقت "زلزال" من الضربات الجوية نفذته أمريكا وإسرائيل بـ 900 غارة ومعاهم قصف بصواريخ كروز وتوماهوك... ودي حاليًا بيعتبرها الصهاينة أكبر هجمة جوية في تاريخهم كله...
الهجمات بتاعت امبارح كانت نتيجتها المباشرة ما يلي:
مقتل المرشد الإيراني ومعاه عيلته كلها تقريبًا (بنته، وزوج بنته، وحفيده، ومرات ابنه)، ومعاهم بعض من صفوة القيادة الإيرانية، وهما وزير الدفاع العميد "عزيز نصير زاده" (تم تأكيد مقتله)، ورئيس الأركان اللواء "عبد الرحيم الموسوي"، وقائد الحرس الثوري "محمد باكبور"، ورئيس استخبارات الشرطة "غلام رضا رضائيان"...
إيران أعلنت الحداد 40 يوم، وعطلة رسمية أسبوع، وعينت "أحمد وحيدي" قائد جديد للحرس الثوري عشان يلملم الشتات... ودلوقتي في مظاهرات ضخمة جدًا في طهران وفي مدن تانية باللبس الأسود تنديدًا بمقتل المرشد ودعوة للانتقام من أمريكا واسرائيل، وسايبلك صور في البوست وفي الكومنتات...
كمان سلاح الجو الصهيوني بقاله ساعات شغال في هجمات ضخمة جديدة على العاصمة طهران وفي مشاهد قصف مخيفة جدًا منتشرة في شبكات الأخبار دلوقتي هسيبهالك في الكومنتات
إيران قالت انها هتنتقم للي حصل ده "انتقام مزلزل"، ورئيس أمين مجلس الأمن القومي الإيراني علي لاريجاني قال في تصريح رسمي: "سنحرق قلب أميركا وإسرائيل كما احترقت قلوبنا على المرشد."
وبعدها مباشرةً أيه اللي حصل؟!
إيران بدأت هجمة ضخمة بالصواريخ الباليستية والمسيرات على كل المدن المحتلة في الكيان الإسرائيلي والقواعد الأميركية وفي دول الخليج...
الهجمات الإيرانية سببت دمار غير مسبوق في دول الخليج، محصلش قبل كده تقريبًا ومشفناش زيه من وقت حرب الخليج... وحتى في وقتها الموضوع موصلش للدرجة دي...
طيب مين بالضبط اللي اتضرر؟!
أولًا الإمارات:
تعرضت لضربات عنيفة بـ 137 صاروخ باليستي و209 درون انتحاري، مع استهداف مطار أبوظبي ومطار دبي أكتر من مرة، وبرج خليفة اتضرب بـ 3 مسيرات تم التصدي ليهم مع خسائر طفيفة في المبنى، وكمان تم استهداف مقر الـ CIA (المخابرات الأمريكية) في دبي بصواريخ إيرانية...
طبعًا هتسألني هو الـ CIA ليهم مقر في دبي؟ وهقولك أنا زيي زيك بالضبط لسه متفاجيء بالمعلومة دي لما عرفتها من كام ساعة!
الإمارات حاليًا أعلنت منع التصوير تمامًا وفرضت رقابة سيبرانية على الهواتف، بعد ما بدأت تظهر مشاهد لضرب برج خليفة وبرج العرب وميناء جبل علي ومنشآت تانية استراتيجية ومهمة للبلد كلها، من ضمنها المنطقة الصناعية!
ثانيًا البحرين:
مطار البحرين الدولي اتضرب كذا مرة امبارح بالمسيرات، وقاعدة الدعم البحري الأمريكية الخاصة بالأسطول الخامس الأمريكي اتضربت، وتم تدمير رادار الكشف المبكر الأمريكي اللي تكلفته أكتر من مليار دولار، مع سقوط صواريخ في منطقة "النعيم"، وبعض الإصابات!
ثالثًا السعودية:
بعض وسائل الإعلام الإيرانية نقلت أخبار عن استهداف قاعدة الأمير سلطان الجوية بالصواريخ والدرونات، وسماع دوي انفجارات شديدة شرق الرياض، وتقريبًا كده في مناطق سكنية!
رابعًا قطر:
وزارة الداخلية القطرية أعلنت عن 16 إصابة لحد دلوقتي بسبب القصف الإيراني، وخسائر مادية كبيرة في مناطق متفرقة...
خامسًا عمان:
إيران استهدفت ناقلة نفط اسمها Skylight من شوية جنب سواحل عمان ودمرتها وقوات البحرية العمانية أجلت طاقمها بالكامل واتصاب منهم 4... وكمان ضربت ميناء الدقم بمسيرتين واتصاب عدد من العمال في المكان!
سادسًا العراق:
ميليشيات موالية لإيران استهدفت قواعد أمريكية في أربيل، ومحاولات للتظاهر واقتحام السفارة الأمريكية في بغداد!
طيب إسرائيل أيه اللي حصل فيها؟!
خد عندك الكام بونبوناية دول: ????
تدمير محطة "سوريك" لتحلية المياه في عسقلان، اللي هي أكبر محطة تحلية في العالم، واتسببت في غرق شوارع تل أبيب بالمياه وقطعها عن بعض المدن!
كمان تم استهداف قاعدة "نيفاتيم" الجوية (اللي فيها طائرات F-35) وإصابتها إصابة مباشرة، وتم ضرب موقع في بلدة "بيت شيمش"، واستهداف قاعدة "تل نوف"، ومقر القيادة العامة للجيش، ومجمع الصناعات الدفاعية، وتم استهداف مبنى وزارة الدفاع...
???? الإسعاف الإسرائيلي من شوية ونقلًا عن الجزيرة أعلن عن إجلاء 456 مصاب للمستشفيات، وتضرر 200 مبنى في تل أبيب، مع سقوط صواريخ في حيفا، وصفد، وبئر السبع، وهيرتزيليا، وبيتاح تكفا... وحاليًا ملايين المستوطنين هربوا للملاجئ وصفارات الإنذار شغالة في كل مكان!
***
???????????? بس المفاجأة بقى ان الموضوع مش واقف هنا... من شوية إيران أطلقت وابل من الصواريخ الباليستية باتجاه قبرص اللي موجود فيها آلاف القوات البريطانية، في أول استهداف مباشر من إيران لواحدة من دول الناتو!
إيران بتصعد بشكل كاسح وخلاص زي ما قلتلك امبارح، هما شغالين دلوقتي بسياسة الرد الانتقامي على كل الدول في المنطقة بلا تفرقة... لدرجة إنهم ضربوا عمان نفسها وهي كانت وسيط في المفاوضات بينهم وبين أمريكا، وكمان هي الدولة الخليجية الوحيدة اللي أدانت الهجمات الأمريكية عليهم!
طيب... أيه اللي جاي
الله أعلم... بس عايز اقولك إن سعر الدهب زاد من امبارح للنهارده داخل في الـ 600 جنيه، غير سعر الدولار اللي بيزيد كمان عندنا في مصر بسبب هروب الاستثمارات عشان الحرب، وفي توقعات بوصول سعر برميل نفط "برنت" لـ 80 دولار، ومنظمة أوبك+ هتجتمع لبحث زيادة الإمدادات اللي أكيد هتتأثر بسبب توقف 11 ناقلة غاز قطرية عن الحركة لتجنب مضيق هرمز (اللي إيران أعلنت إغلاقه بالمناسبة)... ودلوقتي في أزمة طاقة تلوح في الأفق لآسيا وأوروبا!
???? خلينا متابعين مع بعض التفاصيل خلال اليوم النهارده، وهسيبلك مصادر على قد ما أقدر في الكومنتات تحت ???? ومتنساش كالعادة تشير البوست عشان التحديثات دي كلها توصل للناس.
شكرًا.